Agir
Hêz û tirs û pîroziya li destê xudawendan, saw û tirs û evîna li dilê mirovan, ne bi te û ne jî bêyî te; ne bi dûriya te û ne jî bi nêziya te; her divê bi sînor bî, agir.
Carna li nav dilê min î, carna li nav welatê min, carna li bin sêla min, carna hevpar û serdarê jîyana min î û diqijilînî.
Her tişt dikare bibe tu, lê tu her wek xwe yî, agir
Carna Newroza min, carna ola min û carna jî mirina li destê dijminên min
Di nava laşê min de yî.
Di nava xwîna min de.
Dema tu diçî der, ez dimrim; bê jîyan dibim.
Dibim mîna kevirek.
Gelo gîyanî tu?
An jî gîyan tu?
Keser û evîna li dilê perperokê, agir.
Ew e evîndarê te yê mezin û bi evîna te diqijile.
Ji xwe dema bikaribûya xwe bigihîne te, wê evîna wê jî ew qas mezin nebûya.
Keser sira evînê ye.
Dema keser namîne, sir jî wenda dibe.
Û evîn pê re.
.....................
Carna bûyî malê diziyê û dîyarî ji mirovahiyê re.
Bi destê Promethe.
Û hêrsa xudawendan!..
Û tirsa xudawendan!..
Gelo çima ew qas hêrs bûn bi dizîkirina te?
Çima ewqas tirs?
Mirovan dema tu nas kirin û te bi kar anîn, şareza bûn.
Tu bingeha zanyariyê bûyî.
Nasîn û bikaranîna te bû destpêka şaristaniya mirovahiyê.
Gelo xudan ji ber vê yekê ew qas hêrs bûn.
Belê!
Ji ber nezanî, Xudayê xudawendan bû.
Û zanebûn dê bibûna tunebûna wan.
Û Promethe bû berdela şarezayiya mirovahiyê.
Ji bo her pêşketinek berdêlek divê.
Mezinahî ew e ku mirov bizanibe û bikaribe bibe berdêl.
.........................
Mîna gogeke dêwîn, daleqandiyî li asîmanên şîngerok.
Û her tişt bi te rohnî dibe.
Her tişt bi te şîn.
Tune ji te paqijtir tu tiştek û ji te meztir paqijkerek.
Gelo loma ew qas pîroz bû Melekê Tawis?
Loma ew qas pozbilind?!
Gelo ne mafdar bû?!
Çawa dibe?
Ew ji te û Adem ji axê!
Gelo ax ji te paqijtir bû?
Lê ne tu bêyî axê û ne jî ax bêyî te.
Her tişt bi serê xwe ne tu tişt e!
......................................
Çi yî tu?
Kî yî?
Ji ku têyî û bi ku ve diçî?
Heyî, lê tuneyî!
Ha ha ha haaa…
Bu mîna çîrok!..
Hebû tunebû!..
Lê ku bi rastî jî çîrok bî?!
Ku çîrok bî çawa ewqasî jîyan î?!
Çawa ewqasî mirin?!
Lê gelo jîyan û mirin?!…
Û hemû gerdûn?!
Gelo ew jî?!…
...........................................
Dilê min, agir
Evîna min, agir
Welatê min, agir
Jîyana min, agir