HANA AZAD HEWLÊR/ROJ NEWS

Piştî civîna heftiya borî ya di navbera serokê Herêma Kurdistanê Mesûd Barzanî û serokê parlamentoya Herêma Kurdistanê Yûsif Mihemed de, projeya destûra Herêma Kurdistanê bû mijarekî serekî ya rojeva başûrê Kurdistanê.

Îro serokê parlamentoya Herêma Kurdistanê û serokê fraksyonên di nava parlamentoyê de li ser projeya destûrê û dîtina mekanîzmeyekê dicivin. Civîn saet 11.00’an li parlamentoya Herêma Kurdistanê dest pê dike.

Seroka fraksyona Yekîtiya Nîştîmaniya Kurdistanê (YNK) li parlamentoya Herêma Kurdistanê Bêgerd Talabanî di vê derbarê de ji RojNewsê re wiha got: “Ev civînekî şêwiriyê ye û ji bo em mekanîzmeyekê ji bo guftûgokirina li ser destûrê bibînin.”

Derbarê dîtina fraksyona YNK’ê de jî Bêgerd Talabanî wiha got: “Bi baweriya fraksyona YNK’ê ya li parlamnetoya Kurdistanê, pêwîste di vê derbarê de lez bê kirin. Ji ber bi temambûna dema serokatiya Herêma Kurdistanê, wê valehiyekî yasayî di deshilatekî cîbicîkirinê de çêbike.”

Bêgerd Talabanî ragihand ku wê tekezê li ser wê yekê bikin ku sîstema parlamentoya li Herêma Kurdistanê bê cîbicîkirin.

Serokê fraksyona Tevgera Goran li parlamentoya Herêma Kurdistanê Rabûn Marûf jî di vê derbarê de wiha got: “Berê niha jî reşnivîsa ku destûrê derbas kirî, bû cihê nerazîbûnan. Em jî wekî fraksyona Tevgera Goran pêşengê wê hêza siyasî bûn û me li ser derbaskirina destûrê nerazîbûn nîşan da.”

Rabûn Marûf diyar kir ku divê destûr were sererastkirin û wiha dawî li axaftinên xwe anî: “Civîn saet 11.00’an ligel serokatiya parlamentoya Herêma Kurdistanê ji bo vê armancê ye. Divê serokê Herêma Kurdistanê li parlamentoya Kurdistanê bê hilbijartin.”