HEWLÊR (PNA) - Emro çiwarşeme be sedan nuwênerî rêkxirawekanî komelgey medenî xopîşandanêkiyan bo berdem kunsulxaney Turkiya le şarî Hewlêr saz kird û dawayan kird bordumanî nawçe sînuriyekan le layen sûpay Turkiyawe rabigîrê.

Le xopîşandaneke da, xopîşanderan be berzkirdinewey alay Kurdistan û diruşmî corawcor û wêney qurbaniyanî bordumanekanî Turkiya dawayan kird Hikumetî Turkiya hêrşekanî biwestênî.

Lem bareyewe mijde saleyî, Endamî Mektebî Siyasî Yekêtî Afretanî Kurdistan û yekêk le rêkxeranî ew xopîşandane le lêdwanêk da bo rojnamenûsan raygeyand: "maweyeke nawçe sînuriyekanî Herêmî Kurdistan le layen Turkiyawe topbaran dekirên emeş cîge le pêşêlkirdinî sînurî xakî Êraq û Herêmî Kurdistan le layen Hikumetî Turkiyawe ziyanêkî zorî giyanî û malî be hawlatiyanî nîştecêyî ew nawçane geyandiwe".

Ûtîşî: "eme pêçewaney yasa û pirensîpe nêwdewletiyekane û pêşêlkariyekî aşkiray mafî mirove le katêk da hikumetî Turkiya dawa le Sûriya dekat ew kuştarey wilatekey ragirêt keçî xudî Turkiya bote hoy şehîd û birîndarkirdin û wêrankirdinî malî sedan hawlatî sivîl, boye ême le kempînî rêkxirawekanî komelgey medenî ke pêkhatuwîn le nuwênerî 200 rêkxirawî komelgey medenî be tundî îdaney ew pêşêlkayiyane dekeyn û dawa dekeyn: Destbecê Hikumetî Turkiya ew pêşêlkariyane rabigirêt bê geranewe bo hîç pasawêk, Hikumetî Turkiya be fermî daway lêbûrdin le xelkî Kurdistan bikat beramber be şehîdkirdin û ziyangeyandin be hawlatiyan, le katî bûnî her kêşeyekî siyasî pena bo giftûgo bibirdrê be pêkhênanî lîjney danûstan le nêwan wilatî Êraq û Turkiya û be hîç corêk pena bo kuştin û ziyangeyandin be xelk nebirdirêt le hîç barudoxêk da".

Saleyî raşîgeyand: "Ême le kempînî rêkxirawekanî komelgey medenî le helûwêstekaniman berdewam debîn be girtine berî çendîn çalakî medenî le ser astî nêwxoyî û nêwdewletî eger welamî dawakariyekaniman nedrêtewe".