HANA AZAD / HEWLÊR

Ev 15 roje dewreya payîzê ya parlamentoya Herêma Kurdistanê destpê kiriye, lê tenê rûniştinek hatiye lidarxistin. Biryare civîna were lidarxistin jî taybet li ser sererastkirina rêziknameya parlamentoyê be.

Parlamentoya Herêma Kurdistanê biryar girtiye ku roja çarşemê dest bi rûniştinan bike.

Tevî gelek proje yasa li parlamentoyê hene, lê parlamento rêziknameyê dixe bernameya xwe ya kar. Li gor agahdariyên RojNewsê, vê yekê jî peywendî bi postê serokatiya Herêma Kurdistanê ve heye.

Ji ber dema serokatiya serokê Herêma Kurdistanê bi dawî bûye, li gor yasayê ti kesek nikare proje yasayên li parlamentoyê tên pejirandin îmze bike. Li gor zanyariyên RojNewsê jî pejirandina rêziknameyê, pêwîstî bi îmzeya serokê Herêma Kurdistanê nîne.

Parlamentera parlamentoya Herêma Kurdistanê Meryem Semed ji RojNewsê re ragihand: “Niha ti kesek nîne proje yasayên li parlamentoyê tên pejirandin îmze bike. Lewra parlamentoyê rêzikname xistiye bernameya xwe ya kar.”

Meryem Semed bal kişand ser rêziknameya parlamentoyê û wiha got: “Rêzikname 150 maddeye. Ji bo pejirandinê pêwîstî bi demek dirêj heye. Piştî hat pejirandin jî pêwîstî bi îmzekirina serokê Herêma Kurdistanê nîne.”

(şf/rn)