Destên min ên ku di rêzeşewatên te de şewitîn,

destên ku ji bîra kevirên kolanên te naçin,

destên ku bi gulgenimên xwîna te şa dibin,

destên ku di bîna birîna te de li ba dibin,

destên ku rondikên xwe di rûyên te de dikolin,

destên ku li ber dergehên dilê te sêwî dimînin,

destên ku kila çavên te di şevistanê de şevçira dibînin,

destên ku ji şînîgiriya te direvin û di rakêşana xaçê te de werdibin,

destên ku qublenameyên xwe ji goristana te didizin,

destên ku bi darbestan re ber bi te ve dibezin,

destên ku di banga sibehên te de dirizin,

destên ku di germahiya dergûşên destên te de xilmaş dibin,

destên ku bîranînan li ser keviyên bendemanê dinivîsînin,

destên ku çûkên xewna te di hêlînan de diçewisînin,

destên ku ferhenga bêrîkirinê dixwin,

destên ku mafûrên mirinê di şeneyên min de radixin,

destên ku velerzîna min ber bi pencereyên te ve bi xwe re dibin,

destên ku dûmana dudiliya te bi pêlan dipesinînin,

destên ku tembînameya min li ser gerdena te dineqişînin,

destên ku daristana giyanê min bi nehwirînê av didin,

destên ku di axa dilê min har dibin,

destên ku di payîza helbestê de bi pelên hestên min dilîzin,

destên ku di bêdengiya êvaran de hawarên mirinê dibihîzin,

destên ku welatan li ser sînga min bibarînin,

destên ku gulhinaran li ser lêvên qederê dikenînin,

destên ku neynikên westanê li ser devê sînoran dişikînin,

destên ku di berbangan de hinasa şehîdan dibînin,

destên ku demsalên girî bi ser nexşeya evînê de dibarînin,

destên ku reşeewran ber bi deryaçeyên laşê min ve dişînin,

destên ku dojehên xatirxwestinê di sînga min de divemirînin,

destên ku ji zikê eşqê derdikevin,

destên ku di hinavên min de radikevin,

destên ku bi werîsên bendemanê ji çavên min dadikevin,

destên ku ji pûşê peyvê ne,

destên ku ji dilbijîna heyvê ne,

destên ku wek qulinga li ser serê min difirin,

destên ku zimanê min bi kêrên ronahiya xwe dibirin,

destên ku welatê min di rûyê bageran de digirin,

destên ku ji rojê xweşiktir in,

destên ku ji sîberan teniktir in,

destên ku ji hespên Zagrosan hartir in,

destên ku ji hevokên gazindeyan tûjtir in,

destên ku carekê li wir in û sedan caran, wek xenceran, li vir in,

destên ku xelata êgir in,

destên min, pinpinîk in, dişewitin..

destên min,

pir guneh in, kavil û çêregeh in,

di nav destên zarotiya te de dimirin..

 

London