BERHEM LETÎF / ROJNEWS

Keçxal û rêhevala têkoşînê ya Leyla Qasim Sediye Elî Ekber di salvegera şehadeta jina şoreşger de ji RojNews re behsa têkoşîn û jiyana wê kir. Sediye Elî behsa kêliyên ku Leyla gav avêtiye nav şoreşê û heta ku di roja 12’ê Gulanê de bi destê Baasiyan hatiye darvekirin, kir.

Sediya Elî dazanîn ku Leyla hêj di temenê zarokatiyê de ji netewa xwe hez dikir û got: “Li dibistana xwendekarên keç dest bi rêxistinê dikir. Hertim dihat mala me û digot pêwîste ez ji bo netewa xwe xebatê bikim. Digot; divê hertim bala me li ser netewa me be. Bi dizîka karê rêxsitinî dikir, tenê min pê dizanî.”

Keçxala Leyla Qasim di berdewama axaftina xwe de wiha dibêje: “Leyla pola şeşemîn ya seretayî bidawî kir û hate Xaneqîn. Li bajêr xwendina xwe berdewam kir. Li wir jî hema bi keçan re karên rêxistinî dikir. Heta ku pola dawî ya amadeyî bidawî kir û çû zanîngehê. Li Zanîngehê jî xebatên xwe domand. Di sala dawî ya zanîngehê de ji bo lêkolînê çû girtîgeha Ebû Xureyb, dema ji wir vegeriya got ku min lêkolîna xwe xilas kiriye û got; ‘Min li wir pirs li her Kurdekî kiriye, bê tawan li wir hatine girtin.’

‘Leyla gotibû; ‘Dayê negirî ez bûme fedayê Kurdistanê!’

Şevekî hêzên taybet ên Baasî çar aliyê mala Leyla girtin. Dema dayika wê derî vedike, gotibûn em Leyla dixwazin. Leyla tê derve û xwe dide nasîn û dibêje; Fermo ez Leyla me! Bawer nekiribûn ku Leyla ewçend kesek sade be, heta ku nasnameya xwe nîşanî wan dike. Paşê Leyla bixwe re dibin û nêzî 15 rojan ti agahî jê nayê girtin. Rojek beriya were darvekirin nameyekî ji xwîşka xwe re dişîne. Jê re dibêje ku wê sibê min bibin ber darê îdamê û werin serdana min. Roja ku wê biçe ber sêdarê, malbata wê diçin serdanê. Dema malbat diçin, dibînin ku ew û çar hevalên wê di nava qefesê de ne. Bavê wê keniya bû, dayika wê hinekî giriyabû, Leyla gotibû; ‘Dayê negirî ez bûme fedayê Kurdistanê!’”

‘Ez Hertim Kurdim û ezê dest ji Kurdbûna xwe bernedim’

Sediye Elî Ekber dazanîn ku Leyla ji kesî neditirsiya û wiha pêde çû: “Li girtîgehê jê re dibêjin ma tu çend salî yî ku wisa li pey doza netewa xwe ve diçî?, tu çi bixwazî em ê bidin te. Wê jî gotiye; ‘Ez li ser bingehê berjewendiyên şexsî ji bo netewa xwe kar nakim. Ez Hertim Kurdim û ezê dest ji Kurdbûna xwe bernedim.’ Baasî gefa li sêdaredanê li malbata Leyla dixwun, Leyla di bersiva wan de dibêje; ‘Hûn hemû malbata min li sêdarê bidin, min jî li beriya hemiyan, lê em ti caran dest ji netewa xwe bernadin.’”

‘Heta ku hûn cilê Kurdî ji min re neynin û li ber nekim, naçim ber bena sêdareyê’

Li ser şêwazê lisêdaredana Leyla Qasim, Sediye wiha axivî: “Wê rojê malbata wê çûbûn gel Leyla Qasim. Ji wan re gotibûn ku em ê keça we li Sêdareyê bidin. Sibê werin cenazeyê wê bigirin. Di êvara roja 12.05.1974’an de Baasiyan Lelya Qasim darvekirin. Beriya ku li sêdarê bidin, Leyla ji wan re dibêje; ‘Heta ku hûn cilên Kurdî ji min re neynin û li ber nekim, naçim ber bena sêdareyê.’ Dema cilên Kurdî jê re tînin, Leyla dibêje; Fermo niha hûn dikarin min li sêdarê bidin!”

‘Piraniya helbestên xwe ji bo netewa Kurd gotibû’

Di dawiya axaftina xwe de Keçxal û rêhevala têkoşînê ya Leyla Qasim, Sediye Elî bal dikşîne ser hestên welatparêzî yên Leyla û wiha dawî li gotina xwe tîne: “Leyla Qasim helbstevan bû. Piraniya helbestên xwe ji bo netewa Kurd gotibû. Herçend di warê fizîkî de li Bexdayê bû lê bi hest, ruh û xwîna xwe li Kurdistanê bû.”

(ge)